नागपूर : सायबर गुन्ह्यांच्या तपासात उत्कृष्ट कामगिरी करून २०२४ मध्ये शहरातील सायबर पोलीस ठाण्याने मोठे यश संपादन केले आहे. 1 जानेवारी 2024 ते 15 डिसेंबर 2024 पर्यंत सायबर पोलिसांनी ऑनलाइन फसवणुकीशी संबंधित 144 प्रकरणे नोंदवली असून एकूण फसवणूकीची रक्कम 50,06,69,072 रुपये आहे. या कालावधीत पोलिसांनी 33 आंतरराज्य आरोपींना अटक केली असून पीडितांना 3,75,55,999 रुपयांची रक्कम परत मिळवून देण्यात त्यांना यश आले आहे.
याशिवाय, नॅशनल सायबर क्राइम रिपोर्टिंग पोर्टलवर (NCCRP) नोंदवलेल्या प्रकरणांमध्ये एकूण 13,014 तक्रारी प्राप्त झाल्या, ज्यामध्ये फसवणूकीची रक्कम 91,59,77,116 रुपये होती. यावर पोलिसांनी 18,41,70,385 रुपये वसूल केले आणि 2,72,28,942 रुपये पीडितांना परत केले.
फेसबुक, व्हॉट्सॲप, इन्स्टाग्राम, गुगल, ट्विटर (आता एक्स), टेलिग्राम इत्यादी सोशल मीडिया प्लॅटफॉर्मवर महिला आणि मुलांशी संबंधित आक्षेपार्ह किंवा व्हायरल पोस्ट्सबाबत सायबर पोलिसांनी 759 गुन्हे नोंदवले आहेत. तत्काळ कारवाई करत या पोस्ट काढून संबंधित आरोपींवर कारवाई करण्यात आली.
हे सर्व पोलिसांचे उत्कृष्ट तांत्रिक कौशल्य, परिश्रम आणि वरिष्ठ अधिकाऱ्यांचे मार्गदर्शन यांचे परिणाम आहे. पोलीस उपायुक्त लोहित मतानी व अतिरिक्त पोलीस आयुक्त संजय पाटील यांच्या मार्गदर्शनाखाली वरिष्ठ पोलीस निरीक्षक अमित डोळस, निरीक्षक अमोल देशमुख व त्यांच्या सायबर पथकाने ही असामान्य कामगिरी केली आहे.
