नागपूर : नागपूर शहरात नवीन वर्षाच्या पार्ट्यांमध्ये दिल्या जाणाऱ्या अमली पदार्थांची मोठी खेप पोलिसांनी जप्त केली आहे. या कारवाईदरम्यान पाच आरोपींनाही पोलिसांनी पकडले. अंमली पदार्थांची ही खेप राजस्थानहून मध्य प्रदेशमार्गे रस्त्याने नागपुरात आली होती. गुप्त माहितीच्या आधारे पोलिसांनी आरोपीला कोराडी तलावाजवळ अटक केली आहे.
या कारवाईत ५५.४ लाख रुपये किमतीची ५५४ ग्रॅम मेफेड्रोन (एमडी) पावडर, ८१ हजार रुपये किमतीचे पाच मोबाईल आणि १० लाख रुपये किमतीची डस्टर कार जप्त करण्यात आली आहे. याप्रकरणी कोराडी पोलिस ठाण्यात एनडीपीएस कायद्यान्वये गुन्हा दाखल करण्यात आला आहे.
नवीन वर्षामुळे ड्रग्जची मोठी खेप शहरात येणार असल्याची माहिती गुन्हे शाखेच्या एनडीपीएस पथकाला मिळाली होती. या ठोस माहितीच्या आधारे पोलिसांनी कोराडी तलावाजवळ पाच आरोपींचा फिल्मी स्टाईलमध्ये पाठलाग करून डस्टर कारमधून ड्रग्जसह अटक केली.
अटक करण्यात आलेल्या आरोपींमध्ये पवन उर्फ मिहीर मिश्रा, पलास दिवेकर, सुमित चिंतलवार शेख अतिक फरीद शेख उर्फ भुरू आणि मनीष कुशवाह यांचा समावेश आहे. यापूर्वीही अटक करण्यात आलेल्या आरोपींवर खून, खुनाचा प्रयत्न आणि मकोका अंतर्गत गंभीर स्वरूपाचे गुन्हे दाखल आहेत.
पकडण्यात आलेला एमडी नवीन वर्षाच्या निमित्ताने हॉटेल आणि पबमध्ये होणाऱ्या पार्ट्यांमध्ये वापरणार होता. चौकशीदरम्यान पोलिसांना माहिती मिळाली की हे ड्रग्ज राजस्थानच्या अजय सिसोदिया नावाच्या तस्कराकडून आणले होते, त्यानंतर पोलीस आता अजय सिसोदियाचाही शोध घेत आहेत.
