नागपूर : महाराष्ट्र विधानपरिषदेच्या सभापतीपदासाठी प्रा.राम शिंदे यांनी मुख्यमंत्री देवेंद्र फडणवीस यांच्या उपस्थितीत अर्ज दाखल केला. डीसीएम अजित पवार, मंत्री चंद्रशेखर बावनकुळे, चंद्रकांतदादा पाटील, उदय सामंत, जयकुमार रावल उपस्थित होते.
गेल्या 29 महिन्यांपासून रिक्त असलेल्या विधान परिषद सभापतीपदासाठी प्रा.राम शिंदे यांची बिनविरोध निवड निश्चित झाली आहे. महाविकास आघाडीने उमेदवार दिलेला नाही. अध्यक्षपदासाठी १९ डिसेंबरला निवडणूक होणार आहे. या निवडणुकीसाठी महायुतीकडून उमेदवार म्हणून भाजपचे प्राध्यापक राम शिंदे यांच्या नावाची घोषणा करण्यात आली.रामराजे निंबाळकर यांचा कार्यकाळ ७ जुलै २०२२ रोजी संपल्याने विधानपरिषदेचे सभापतीपद रिक्त होते. राज्य मंत्रिमंडळाचा शपथविधी सोहळा झाला असला तरी अद्याप खातेवाटप झालेले नाही.शिंदेसेनेकडून काही महत्त्वाच्या पदांची मागणी करण्यात आली होती. यामध्ये विधान परिषदेच्या अध्यक्षपदाचाही समावेश होता. विधान परिषदेचे एकूण गणित पाहिल्यास भाजपचे सर्वाधिक सदस्य आहेत. त्यामुळे भाजपने राम शिंदे यांचे नाव दिले.राज्यपालांनी पाठवलेल्या वेळापत्रकानुसार बुधवारी दुपारी १२ वाजेपर्यंत अर्ज सादर करायचे होते. शिंदे यांनी सकाळी अर्ज दाखल केला. त्याचवेळी माविआने उमेदवार न देण्याची भूमिका घेतली.
